بالحجر الصحي شنو عندنا غير الاكل والسهر والمسلسلات ؟ عن نفسي كانت كامرتي مسليتني .. صورت يومياتنا وحبيت اوثقها للذكرى مع انها مو خوش سنه ، لكن بشكل عام أحب التوثيق ، بشهر مايو القمر لما كان بدر كامل على طول اخذت الكاميرا وطلعت بالحوش وكنت اتمنى لو عدستي مناسبه لتصوير القمر ، هذا اللي طلع معاي وايد حبيت الصوره والوضوح.

نقدر نقول ان عادت الحياة على طبيعتها نوعًا ما، من بعد حبس بالبيت قريب الـ100 يوم .. وقتها كنت اصبّر نفسي واقول بتعدي الأيام وميخالف بتطوف وكل شي خيره وبين اهلي ماحسيت بالملل والضيقه ، صح مرت علينا ايام حزينه بس قدرنا نتخطاها ، الحين بعد ماقدرنا شوي شوي نرد للحياة نطلع ونروح نستغل فترة السماح قبل الحظر ، من اذكر قبل شهر شلون كناا عايشين احس انقمت وماودي نرد وافكر شلون قدرنا نتحمل طول هالاشهر ؟ هل الله نزّل علينا الصبر وخلانا نتحمل ولا من كثرة دعاوي اهالينا عشان نتجاوز هذي المرحلة ؟ خصوصًا ان كنا عايشين بتوتر وخوف نوعًا ما من هالوباء وكل ما كنت اشوف عدد الوفيات يضيق خلقي اكثر واصبر نفسي .. الحين كررهت الاخبار ولا ابي اقرا اي شي يخص الوباء لان هالشي يضيق الخلق ،، ابي نرد حياتنا الطبيعيه اشتقت حق الجامعه وحق الدكاتره اشتقت حق زوارتنا كل خميس وكل يمعه اشتقت حق يمعاتنا .. خبر اكمال دراستنا بعد شهر وايد فرحني واتمنى لو يكون بالجامعه مو عن بُعد عشان نحس فعلا ان ردينا للحياة.

ساعات الظروف والمواقف الصعبة تبين لنا أمور مخفيه ، مثال .. وباء كورونا والحجر الصحي بين لنا أمور وايد جميلة على ان هذا الوباء شر ومرض إلا ان اكتشفت أشياء جداً جميلة ، اولاً اهلي .. كنت فاقدة قعدتي معاهم والسبب طلعاتي ودراستي بالجامعة بحكم إني خريجة وضغط علي وكلاساتي كانت من الصبح ليه وقت متأخر حتى أني ماكنت ألحّق على وجبة الغدا ولا كنت اقعد معاهم على طاولة الطعام .. الحجر الصحي جمعني بأهلي وخلاني قريبه منهم أكثر صرنا نفهم بعض صرنا نتعاون مع بعض وننجز أكثر .. ثانيًا التقرب إلىٰ الله ، فيبعض الأحيان الله يشتاق لصوت عبده ويحب عبده يدعيله ويتقرب منه ، هذا البلاء خلانا كلنا نكون اقرب إلى الله سبحانه وتعالى لان بيده كلشئ وهو الرحيم العطوف، تعلمت ان احنا في بلد الانسانيه بلد الخير وان احنا فعلًا بأمن وأمان .. ثالثًا ، اكتشفت مواهبي تعلمت أطبخ وأدخل المطبخ ومن خلال هذا الشئ تركت أكل المطاعم واكتشفت إني أتلذذ بأكل البيت اكثر ، منها مفيد وصحي وتوفير ، قريت أشياء تفيدني تعلمت الرسم وتعلمت العزف ونمّيت مواهبي اكثر ، تعلمت أن كل شيء من الله فيه حكمة وكل خيره فيها تأخيره وبالنهاية أكيد ليس من بعد العسر إلا اليسر بإذن الله.

بما إني أحب التصوير وايد ومن زمان أطمح إني أفتح لي استيديو خاص للتصوير ويكون لي مشروعي الخاص .. بهذا اليوم قدرت أشتري معدات التصوير والاستيديو من إضاءات وخلفيات ، شعور جميل لمن الشخص يحقق الي يبيه وينجز بالشي الي اهوا يحبه، هذه إحد الصور الي صورتها مع كامرتي نوعها سوني .. الكاميرا جدًا جميلة وضوحها رائع، قمت بالتعديل على الصور من خلال برنامج اللايت رووم هذا البرنامج رائع نقدر من خلاله نعدل على الصور ونظهرهم بشكل أفضل من حيث الاضاءة وتغير بسيط بألوان الصوره ووضوحها وطبعا حسب كل واحد ونظرته وذوقه.

يوم الأثنين تاريخ ١٧ فبراير ٢٠٢٠م في كلية الآداب ، اقترح علينا دكتور عيسى النشمي أن نلقي نظرة علىٰ إحدىٰ الأنشطة الموجودة بالجامعة وبالأخص كليتنا الآداب ونلتقط صور مناسبة ونطبق ما تناولناه في مقرر تصميم الإعلامي متعدد الوسائط ونحاول كثر مانقدر نتعلم كيفية أساسيات التصوير والتعديل عليها.